“मंदिरात जायचे नाही” म्हणत चावी काढली, मोटारसायकल पाडली आणि नारळ फोडण्याच्या दगडाने डोक्यात घातला — हे पाहून परिसरात संतापाचे वातावरण

जामखेड तालुक्यातील बटेवाडी शिवारात एक अत्यंत धक्कादायक घटना घडली आहे. मारुती मंदिराजवळ मोटारसायकल लावण्याच्या क्षुल्लक कारणावरून दारूच्या नशेत असलेल्या एका व्यक्तीने नारळ फोडण्याच्या दगडाने तरुणाच्या डोक्यात वार केला. या हल्ल्यात मुकुंद रघुनाथ पोकळे हे गंभीर जखमी होऊन सध्या अतिदक्षता विभागात (ICU) उपचार घेत आहेत.

नक्की काय घडलं?

बटेवाडी शिवारातील मारुती मंदिराजवळ मुकुंद पोकळे यांनी मोटारसायकल लावली होती. तेवढ्यात बाळू उर्फ दीपक मनोहर खरात हा दारूच्या नशेत तेथे आला.

“मंदिराजवळ मोटारसायकल का लावली? इथे यायचं नाही” असे म्हणत त्याने मोटारसायकलची चावी काढली आणि थेट मोटारसायकल खाली पाडली.

मुकुंद पोकळे आणि फिर्यादी शिवाजी मोरे यांनी विरोध केला असता बाळू खरात याने नारळ फोडण्यासाठी वापरण्यात येणारा मोठा दगड उचलला आणि मुकुंद पोकळे यांच्या डोक्यात जोरात वार केला.

दोघेही जखमी

या हिंसक हल्ल्यात मुकुंद पोकळे गंभीर जखमी झाले असून त्यांना तातडीने रुग्णालयात दाखल करण्यात आले. सध्या ते अतिदक्षता विभागात उपचार घेत असून त्यांची प्रकृती चिंताजनक असल्याचे सांगण्यात येत आहे.

फिर्यादी शिवाजी मोरे यांनाही या प्रकरणात मारहाण झाली असून त्यांच्याही डोक्याला दुखापत झाली आहे.

पोलीस कारवाई

या प्रकरणी आरोपी बाळू उर्फ दीपक मनोहर खरात याच्याविरुद्ध जामखेड पोलीस ठाण्यात गुन्हा दाखल करण्यात आला आहे. पोलीस पुढील तपास करत असून आरोपीच्या अटकेबाबत कारवाई सुरू आहे.

⚠️ कोणावर अन्याय होत असेल किंवा मदत हवी असल्यास: 📞 Abtimes24.com | संपर्क: 9359141846