📰 लक्ष्मीताई पवार यांना ‘महाराष्ट्र गुणगौरव पुरस्कार २०२६’ जाहीर; सामाजिक कार्याची दखल

जामखेड : “बी द चेंज फाउंडेशन” तर्फे दिला जाणारा प्रतिष्ठित महाराष्ट्र गुणगौरव पुरस्कार २०२६ जामखेड येथील जनविकास सेवाभावी संस्थेच्या अध्यक्षा लक्ष्मीताई पवार यांना जाहीर झाला आहे. त्यांच्या उल्लेखनीय सामाजिक कार्याची दखल घेत हा सन्मान जाहीर करण्यात आला असून सर्व स्तरातून त्यांच्यावर अभिनंदनाचा वर्षाव होत आहे.
अहिल्यानगर जिल्ह्यातील शिर्डी येथे रविवार, १७ मे २०२६ रोजी होणाऱ्या भव्य पुरस्कार वितरण समारंभात मान्यवरांच्या हस्ते त्यांना हा पुरस्कार प्रदान करण्यात येणार आहे. अशी माहिती फाउंडेशनचे अध्यक्ष अभिषेक तुपे यांनी दिली आहे.
फाउंडेशनकडून देण्यात आलेल्या पत्रात नमूद करण्यात आले आहे की, लक्ष्मीताई पवार यांनी आपल्या कार्यक्षेत्रात केलेले उल्लेखनीय योगदान, समाजासाठी दिलेली निःस्वार्थ सेवा आणि त्यांच्या कार्यातून निर्माण झालेली सकारात्मक प्रेरणा लक्षात घेऊनच त्यांची या प्रतिष्ठित पुरस्कारासाठी निवड करण्यात आली आहे.
विशेष म्हणजे, लक्ष्मीताई पवार या आदिवासी पारधी समाजातील एक सक्रिय व कर्तबगार महिला असून त्या आपल्या समाजाच्या उन्नतीसाठी सातत्याने कार्यरत आहेत. जनविकास सेवाभावी संस्थेच्या माध्यमातून त्या आदिवासी समाजासह सर्व घटकांसाठी विविध पातळ्यांवर काम करत आहेत.
शिक्षण, महिला सक्षमीकरण, सामाजिक न्याय आणि वंचित घटकांना मुख्य प्रवाहात आणण्यासाठी त्यांनी केलेले कार्य विशेष उल्लेखनीय ठरत आहे. जामखेडमध्ये पारधी समाजातील सर्वात कमी वयाचा नगरसेवक म्हणून हर्षद भैया काळे यांची निवड होण्यातही लक्ष्मीताई पवार यांचा मोलाचा वाटा राहिला आहे.
त्यांच्या कार्यामुळे समाजात सकारात्मक परिवर्तनाची नवी दिशा निर्माण होत असून अनेकांसाठी त्या प्रेरणास्थान बनल्या आहेत. या पुरस्काराबद्दल विविध सामाजिक, राजकीय व शैक्षणिक क्षेत्रातील मान्यवरांकडून त्यांचे अभिनंदन करण्यात येत आहे.