पुण्यातील अनिकेत निमगावकर याचा मृतदेह म्हाडा कॉलनी परिसरात आढळला — पोलीस तपास सुरू

जामखेड शहरातील म्हाडा कॉलनी परिसरात एका २९ वर्षीय तरुणाचा मृतदेह आढळून आल्याने परिसरात खळबळ उडाली आहे. अनिकेत बेंजामिन निमगावकर (वय २९, रा. वडगाव शेरी, पुणे; मूळ रा. जामखेड) असे मृत युवकाचे नाव असून, ही घटना समजताच नागरिकांमध्ये तीव्र चर्चेला उधाण आले आहे.

नक्की काय घडलं?

अनिकेत बेंजामिन निमगावकर हा मूळचा जामखेडचा असून त्याचे वडील एस.टी. महामंडळात कंडक्टर होते. मतदान नोंदणीच्या कामासाठी तो जामखेड येथे आला होता.

शुक्रवारी (दि. २५ सप्टेंबर) त्याने आपले चुलते सुरेश निमगावकर यांना फोन करून “मित्रासोबत आहे, सकाळी घरी येतो” असे सांगितले होते. मात्र शनिवारी (दि. २६ सप्टेंबर) सकाळी सुमारे १०.३० वाजता नवीन कोर्टासमोरील म्हाडा कॉलनी परिसरात त्याचा मृतदेह आढळून आला.

पोलीस तपास सुरू

या घटनेची माहिती मिळताच जामखेड पोलिसांनी तातडीने घटनास्थळी धाव घेतली. चुलते सुरेश निमगावकर यांच्या माहितीवरून जामखेड पोलीस ठाण्यात भारतीय नागरिक सुरक्षा संहिता (BNSS) २०२३ मधील कलम १९४ अन्वये अकस्मात मृत्यूची नोंद करण्यात आली असून रजिस्टर क्रमांक ६८/२०२६ आहे.

मृत्यूचे नेमके कारण अद्याप स्पष्ट झालेले नाही. पोलीस निरीक्षक दशरथ चौधरी यांच्या मार्गदर्शनाखाली सहायक फौजदार शिवाजी कदम पुढील तपास करत आहेत.

पुढे काय?

पोस्टमार्टम अहवालानंतरच मृत्यूचे नेमके कारण स्पष्ट होणार आहे. पोलीस या प्रकरणाचा सर्व बाजूंनी तपास करत असून लवकरच अधिक माहिती समोर येण्याची शक्यता आहे.