🚨 Jamkhed Accident News : अहिल्यानगर-मिरजगाव महामार्गावर भीषण अपघात; जामखेडच्या दोन तरुणांचा जागीच मृत्यू

Jamkhed : अहिल्यानगर-मिरजगाव महामार्गावर रविवारी रात्री झालेल्या भीषण कार अपघातात जामखेड येथील दोन तरुणांचा दुर्दैवी मृत्यू झाला असून एक जण गंभीर जखमी झाला आहे. या हृदयद्रावक घटनेमुळे संपूर्ण जामखेड शहरावर शोककळा पसरली आहे.

मिळालेल्या माहितीनुसार, जामखेड येथील ज्येष्ठ विधिज्ञ अॅड. भगवान जायभाय यांचे सुपुत्र अॅड. विराज भगवान जायभाय (वय अंदाजे २५) हे पुण्यातील शिवाजीनगर न्यायालयात वकिली व्यवसाय करत होते. मोठ्या भावाच्या विवाहासाठी ते जामखेड येथे आले होते. विवाह सोहळा आटोपल्यानंतर रविवारी रात्री विराज जायभाय, सोनू डुचे (वय अंदाजे २४) आणि त्यांचा पुण्यातील एक मित्र असे तिघेजण आय-20 कारमधून (MH 17 AZ 3242) पुण्याकडे निघाले होते.

दरम्यान, मिरजगावजवळील आंबिलवाडी परिसरातील धोकादायक वळणावर चालकाचा अंदाज चुकल्याने भरधाव कार रस्ता सोडून खाली गेली. त्यानंतर वाहनाने अनेक पलट्या घेतल्या आणि भीषण अपघात झाला. अपघात इतका गंभीर होता की अॅड. विराज जायभाय आणि सोनू डुचे यांचा जागीच मृत्यू झाला, तर तिसरा मित्र गंभीर जखमी झाला आहे.

अपघाताचा मोठा आवाज ऐकून स्थानिक नागरिक तातडीने घटनास्थळी धावून आले. त्यांनी कारमध्ये अडकलेल्या तरुणांना बाहेर काढून मदतकार्य सुरू केले. तसेच जामखेड येथे संपर्क साधून घटनेची माहिती दिली. जखमी तरुणावर उपचार सुरू असून त्याची प्रकृती चिंताजनक असल्याचे समजते.

या दुर्दैवी घटनेमुळे दोन्ही कुटुंबांवर दुःखाचा डोंगर कोसळला असून जामखेड तालुक्यात हळहळ व्यक्त होत आहे.

दरम्यान, अॅड. विराज जायभाय यांच्या निधनाबद्दल जामखेड तालुका वकील संघाच्या वतीने श्रद्धांजली अर्पण करण्यात आली. तसेच या दुःखद घटनेत सहभागी होत दोन दिवस न्यायालयीन कामकाज बंद ठेवण्याचा निर्णय घेण्यात आल्याची माहिती वकील संघाचे अॅड. अमीर खान यांनी दिली.